വെല്ലിംഗ്ടണിലെ ഹെന്റി സ്റ്റേഡിയത്തില്‍ നടന്ന രണ്ടാം ഏകദിനത്തിലും ന്യൂസിലാന്‍ഡ് ബാറ്റിംഗ് നിരയെ എറിഞ്ഞൊതുക്കി ഇന്ത്യന്‍ ബൗളര്‍മാര്‍. മത്സരത്തില്‍ മികച്ച ബൗളിംഗ് പ്രകടനം പുറത്തെടുത്ത ഇന്ത്യ, ആതിഥേയരെ 41 ഓവറില്‍ വെറും 134 റണ്‍സിന് ഓള്‍ഔട്ടാക്കി. ആദ്യ മത്സരത്തില്‍ 185 റണ്‍സിനും രണ്ടാം മത്സരത്തില്‍ 134 റണ്‍സിനും പുറത്താക്കിയതോടെ ന്യൂസിലന്‍ഡ് ബാറ്റിംഗ് നിരയെ പൂര്‍ണ്ണമായും സമ്മര്‍ദ്ദത്തിലാക്കാന്‍ ഇന്ത്യന്‍ ബൗളിംഗ് നിരയ്ക്ക് സാധിച്ചു.
മഴമൂലം വൈകി ആരംഭിച്ച മത്സരത്തില്‍ ടോസ് നേടിയ ഇന്ത്യന്‍ ക്യാപ്റ്റന്‍ ശുഭ്മാന്‍ ഗില്‍ ഫീല്‍ഡിംഗ് തിരഞ്ഞെടുക്കാന്‍ ഒട്ടും മടിച്ചില്ല. ക്യാപ്റ്റന്റെ തീരുമാനം ശരിവെക്കുന്ന രീതിയിലാണ് ഇന്ത്യന്‍ ബൗളര്‍മാര്‍ മൂടിക്കെട്ടിയ അന്തരീക്ഷം മുതലാക്കി എതിരാളികളെ എറിഞ്ഞുവീഴ്ത്തിയത്.
മഴമൂലം ഓവറുകള്‍ വെട്ടിച്ചുരുക്കിയ മത്സരത്തില്‍ തുടക്കം മുതല്‍ തന്നെ കൃത്യമായ ഇടവേളകളില്‍ വിക്കറ്റുകള്‍ വീഴ്ത്തി ഇന്ത്യ മത്സരത്തില്‍ ആധിപത്യം നേടി. പോരാട്ടവീര്യം പുറത്തെടുത്ത ഡാരില്‍ മിച്ചല്‍ അര്‍ദ്ധസെഞ്ചുറിയോടെ (55) പിടിച്ചുനിന്നെങ്കിലും, മറുവശത്ത് പിന്തുണ നല്‍കാന്‍ ആരുമില്ലാതിരുന്നതോടെ ആതിഥേയര്‍ക്ക് വലിയ സ്‌കോര്‍ പടുത്തുയര്‍ത്താനായില്ല.
ഇന്ത്യയ്ക്കായി ഗുര്‍നൂര്‍ ബ്രാര്‍ നാല് വിക്കറ്റുകള്‍ വീഴ്ത്തി ബൗളിംഗ് നിരയെ മുന്നില്‍ നിന്ന് നയിച്ചപ്പോള്‍ ആക്വിബ് നബി, അന്‍ഷുല്‍ കംബോജ്, അക്‌സര്‍ പട്ടേല്‍ എന്നിവര്‍ രണ്ട് വിക്കറ്റ് വീതം വീഴ്ത്തി മികച്ച പിന്തുണ നല്‍കി. അര്‍ഷ്ദീപ് സിംഗിന് വിക്കറ്റൊന്നും ലഭിച്ചില്ലെങ്കിലും, പുതിയ പന്തില്‍ റണ്‍സ് വിട്ടുകൊടുക്കാതെ മികച്ച രീതിയില്‍ പന്തെറിയാന്‍ താരത്തിന് സാധിച്ചു.
തുടക്കത്തില്‍ തന്നെ രണ്ട് ഓപ്പണര്‍മാരെയും പുറത്താക്കി ആക്വിബ് നബിയാണ് ന്യൂസീലന്‍ഡിന് പ്രഹരമേല്‍പ്പിച്ചത്. ടീം സീഫെര്‍ട്ട് 5 പന്തില്‍ റണ്ണൊന്നുമെടുക്കാതെയും വില്‍ യംഗ് 17 പന്തില്‍ 6 റണ്‍സെടുത്തും പുറത്തായി. തൊട്ടുപിന്നാലെ 11 റണ്‍സെടുത്ത ഹെന്റി നിക്കോള്‍സിനെ അന്‍ഷുല്‍ കംബോജ് പുറത്താക്കിയതോടെ ന്യൂസിലാന്‍ഡ് 23/3 എന്ന നിലയിലേക്ക് തകര്‍ന്നു.
തുടര്‍ന്ന് അഞ്ചു ഫോറുകളും രണ്ട് സിക്‌സറുമടക്കം 104 പന്തില്‍ 55 റണ്‍സെടുത്ത് ഡാരില്‍ മിച്ചല്‍ ടീമിനെ കരകയറ്റാന്‍ ശ്രമിച്ചു. 38 പന്തില്‍ 31 റണ്‍സെടുത്ത ക്യാപ്റ്റന്‍ മിച്ചല്‍ സാന്റ്‌നറുമൊത്ത് ആറാം വിക്കറ്റില്‍ 59 റണ്‍സിന്റെ കൂട്ടുകെട്ടുണ്ടാക്കാന്‍ മിച്ചലിനായി.
എന്നാല്‍ സാന്റ്‌നറെ പുറത്താക്കി ഗുര്‍നൂര്‍ ബ്രാര്‍ ഈ കൂട്ടുകെട്ട് പൊളിച്ചു. തൊട്ടുപിന്നാലെ ടോം ലാഥം, ഗ്ലെന്‍ ഫിലിപ്‌സ് എന്നിവരെയും ബ്രാര്‍ വേഗത്തില്‍ പുറത്താക്കി.
10 ഓവറില്‍ 30 റണ്‍സ് വഴങ്ങി 4 വിക്കറ്റ് വീഴ്ത്തിയ ഗുര്‍നൂര്‍ ബ്രാര്‍ ആണ് കരിയറിലെ മികച്ച പ്രകടനത്തോടെ ഇന്ത്യന്‍ ബൗളര്‍മാരില്‍ തിളങ്ങിയത്. അക്‌സര്‍ പട്ടേല്‍ 28 റണ്‍സിന് 2 വിക്കറ്റും ആക്വിബ് നബി 31 റണ്‍സിന് 2 വിക്കറ്റും നേടി. ബ്ലെയര്‍ ടിക്നറെ (2) ബൗള്‍ഡാക്കി അന്‍ഷുല്‍ കംബോജ് ഇന്നിംഗ്‌സ് അവസാനിപ്പിച്ചതോടെ ന്യൂസിലാന്‍ഡ് 134 റണ്‍സിന് ഓള്‍ഔട്ടായി.
content highlights: Bowlers Dominate: India Bundles Out New Zealand for Just 134 Runs